مستقبل بلا اطباء
.
مهنة الطب مهنة نمطية جدا .. ممكن البعض يشوف كلامى دا غريب لكن دا كلام المهندسين اللى شغالين على خوارزميات الذكاء الاصطناعي للـ ( الاطباء الروبوتات) ..
كل طبيب فى اى تخصص بتكون محصلة العلوم اللى اتعلمها فى الكلية وبرا الكليةneural network موجودة فى دماغه حتى لو هو مش مدرك كدا .. واحنا وظيفتنا كمهندسين اننا نطلع الكلام دا فى صورة كود برمجي .. شجرة من الاحتمالات بتكون طرق كتير كل طريق معروفة نهايته.
.
.
دا بالظبط اللى اشتغلت عليه شركات كتير ومنها اللى نجح نجاح باهر .. شركة ( بابلون هيلث ) كمثال ..
الشركة دى عملت طبيب بيعتمد على الذكاء الاصطناعي .. ببساطة ممكن تنزل ابليكيشن على موبايلك وتتكلم معاه .. اهلا انا عندى صداع .. يقولك يا حراااام الف سلامة .. عندك ضغط ؟ تقوله لا .. طب نمت كويس ؟ تقوله اه .. طب متجوز مصرية ؟ طب عندك ابن اسمه احمد ؟ ... إلخ لحد ما يشخص سبب الصداع ..
.
احيانا بينصح بزيارة الطبيب لانك بتحتاج فحص فيزيكال .. احيانا بيطلب من اشعة وتحاليل وبتبعتهاله .. واحيانا بيوجهك للتدخل الجراحي ..
.
ممكن كمان تاخد الروشتة منه .. وممكن تخليه يبعت الروشتة اوتوماتيك للصيدلية اللى بتتعامل معاها ويعمل بيها اوردر يوصلك لحد البيت ..
.
.
طب مدي دقة نتايجه ؟
فى يونيو 2016 اتعمل اختبار للذكاء الاصطناعي الخاص ببالون هيلث .. جابوا مجموعة من الاطباء الجونيورز .. والتمريض السينيورز .. واشتغلوا على مجموعة من المرضى لقياس كفاءة كل شريحة بالمقارنة بالتانيين .. الكلام دا كله كان فى جامعة اكسفورد ..
بابلون تصدر المنافسة بـنسبة 92% دقة فى التشخيص بالاضافة للسرعة اللى تفوق فيها بشكل مطلق .
بعده الاطباء بنسبة 82% و التمريض بنسبة 77%..
الظريف انى عرفت كل الكلام دا بالصدفة البحتة لما كنت بدور على علماء شغالين فى نقطة معينة محتاجها فى الروبوت اللى بعمله للى عندهم مشكلة فى حركة رجليهم .. وصلت على ريسرش جيت ( موقع تواصل ونشر خاص بالعلماء والباحثين ) لبروفيسور اسمهIrwin Nazareth .. هو دا اللى اشتغل على الاختبار اللى لسة كنت بنحكي حدوته .. الراجل دا عمل 420 نشر !!
.
.
طيب ايه الخطوة اللى بعد كدا ؟!
الخطوة اللى بعد كدا تكبير الـ neural network الخاصة بالروبوت لتشمل كل فروع الطب وبعدين تحويل الروبوت من مجرد تشات بوت لـphysical robot .. طبيب آلى بيكشف عليك زى ما الطبيب البشري بيعمل بالظبط وطبعا هيكون اكفأ لان شبكته العصبية محكمة اكتر و قياساته البصرية والسمعية و الحسية ادق بمراحل ..
.
.
الكلام دا هنوصله امتي ؟
يمكن وتيرة التطور سريعة جدا فى التراك دا لكن لاعتبرات اقتصادية فمظنش قبل 50 سنة.
.
وبعيدا عن الليلة دى كلها ..
انا معرفش الناس لسة بتدخل طب ليه ؟ دى وظيفة تشل ومش جايبة همها..
بواسطة: أحمد أبو الفتوح
ليست هناك تعليقات:
إرسال تعليق